بداية وحتى تصبح مواطنا غزاويا يجب عليك اتقان الكشرة الغزاوية :@:
فهادا اللي بيميز الإنسان الغزاوي عن الإنسان العادي..
البوز الملوي .. الحواجب المعقودة .. وإذا نظر إليك أحدهم فقل له بكل استعلاء:
(أبو الشباااااب .. ايش مااالك مبحلق بخلقتي هييييك .. كنك مضيع بريزة فوجهي)
وهيك بتكون قطعت شوط كبير نحو الغزغزة
وتبعا للنقطة السابقة.. فلتسير على مبدأ الي بيتطلع عليك بعين .. اتطلع عليه بنص عين .. يعني نظرة انقرافية بحتة ..
يعني بالعربي .. (كلك على بعضك مش شايفك)
تعلم فن التعصيب.. وأقل كلمة تولعك وتوصل صوتك للجيران
عصب وصرخ وبزق وانت بتحكي .. على شرطي المرور .. على الكونترول .. على سواق التاكسي
المهم تتقاتل مع أي حد يوميا .. وتحرق بعدها باكيتات دخان
المواطن الغزاوي المناضل انسان كالصخر .. خارق للمنطق والعادة.. ولا يخضع لأي عمليات حسابية ..
نضرب مثال:
المواطن الغزاوي العادي ولنفرض انو عندو بيت في أحسن الأحوال .. يعني بيدفعش أجارات .. حيدفع حوالي 170 شيكل كهربا بالشهر ..
عندو سيارة بيدفع قسطها الشهري حوالي 500 شيكل ..
وبنزين على زيت على هالتحابيش هادي بدو 500 شيكل .. بتعرفو البنزين غالي
حيدفع دخان وبمعدل باكيت في اليوم (هادا المش مدخن .. الي بيسبرس بس ) .. فإزا قلنا الباكيت ب25 شيكل .. احسبها بتصير 750 شيكل بالشهر
احكي بدو 500 شيكل بالشهر أكل وشرب .. هادا لو مقتصد يعني
بطاقات جوال بدو 60 شيكل .. هادا لو بيحكيش الا للضرورة ولا بيحب ولا نيلة .. إزا بيحب احسبولو 200 شيكل
هيك بيصير المجموع .. 2480 شيكل .. هادا أقلللللل اشي ممكن
ونظرا الى متوسط دخل الفرد في غزة .. والي هو 1000 شيكل .. وبغض النظر انو فش رواتب حاليا .. بنلاقي انو المصاريف أكتر من الراتب بأضعاف
كيف بتزبط معو .. الله أعلم
وحتى تصبح مواطن غزاوي يجب أن يكون لديك أو امتلكت في يوم ما
أو تحلم بأن تمتلك إحدى السيارات التالية:
كيا سيفيا
هونداي اكسنت
BMW 320
مرسيدس موديل 82-85
مرسيدس موديل الستينات
القرقعة
المواطن الغزاوي مواطن يحب المظاهر
يعني إزا ما كانش معاك ولا أجورة يجب أن تتعلم فن العرط
(فن العرط: هو الكذب والإدعاء انك مليونير)
أي أن تجلس مع الشباب وتوهمهم أنك ولدت وفي تمك معلقة من دهب
مع انو الواقع الأليم انك ولدت وفي تمك معلقة من خـ** (كلمة مشفرة) بعيد عنكو
يعني مارس فن التشبير وعلق الهامر على جنبك ..
وفضي بكيت الإل ام في المارلبورو لزوم الفشخرة
حتى تكون مواطن غزاوي .. يجب أن يكون أحد أقرباءك من مواليد ألف وتسعمية وتنكة .. اله سن دهب
حتى تكون مواطن غزاوي.. لازم تكون دقر .. تعلم المداقرة
إزا واحد دق عليك الباب احكيلو ميييين؟ بس يحكيلك أنا فلان ..
قلله على طول لا مش انت .. المهم تداقر شوية على أي موضوع حتى لو عارف حالك غلطان
حتى تكون مواطن غزاوي .. يجب أن يكون لك واسطة في كل دائرة حكومية
قرابة .. نسب.. صحبة .. أو ابن عم خالة جدها لمرت جار أخوك برضو بتنفع
حتى تكون مواطن غزاوي ..
تعلم فن التقسيط
موبايل أقساط
سيارة أقساط
أثاث بيت أقساط
جرابين أقساط
ازا عملت كل الشغلات الي فوق ..
فمبرووووووووووك .. انت غزاوي